Pani Sakina ko Pilao

Ya Abbas (a.s.) Ya Abbas (a.s.) Ya Abbas (a.s.)

Abbas Abbas - 2

Tumhi se aas lagaye udaas baithe hain
Ye pyase bachche jo Zainab (a.s.) ke paas baithe hain
Abbas (a.s.) kahan ho

Pani zara khaimon mein lao Ghazi (a.s.)
Pani Sakina (a.s.) ko pilao

Bachchon ko tum chehra dikhao Ghazi (a.s.)
Pani Sakina (a.s.) ko pilao

Ab tak na pyas bujhi, khaime ke dar pe khadi
Roti hai kuza uthaye
Asghar (a.s.) ko dekhti hai, sab se ye poochti hai
Mere chacha kyun na aaye
Pani use laakar pilao Ghazi (a.s.)
Pani Sakina (a.s.) ko pilao

Bolo Abbas-e-Jari (a.s.) kyun itni der hui
Bachchon ko aakar sambhalo
Karte hain yaad tumhein, phaila ke haath unhein
Seene se apne lagalo
Dekha nahin kab se, aajao Ghazi (a.s.)
Pani Sakina (a.s.) ko pilao

Kuze uthalo sabhi, aate hi honge abhi
Mashkiza khaimon mein leke
La denge pani hamein, rokega kaun unhein
Ammu bahadur hain mere
Toote na dil bachchon ka, aao Ghazi (a.s.)
Pani Sakina (a.s.) ko pilao

Aajao laut ke ghar, neend aa rahi hai magar
Soti nahin hai Sakina (a.s.)
Tum ko maloom hai sab, soti hai paas ho jab
Tum aur Baba ka seena
Lori use aakar sunao Ghazi (a.s.)
Pani Sakina (a.s.) ko pilao

Jab se ye shor utha, Abbas (a.s.) mara gaya
Tooti hai sab par qayamat
Karte hain roke dua, dariya pe hon aye Khuda
Ammu hamare salamat
Hausla bachchon ka badhao Ghazi (a.s.)
Pani Sakina (a.s.) ko pilao

Maqtal mein jo bhi gaya, wapas na laut saka
Masoom ghabra rahe hain
Dikhta nahin hai alam, dil mein Saqqa-e-Haram
Kya kya khayal aa rahe hain
Phir se zara parcham uthao Ghazi (a.s.)
Pani Sakina (a.s.) ko pilao

Dariya pe sab ne dekha
Parcham-e-Abbas (a.s.) utha
Bali Sakina (a.s.) ne kaha
Dekho woh aate hain Chacha

Jab woh alam paas aaya
Bachchon ka dil toot gaya
Khoon mein dooba woh alam
Rakh ke Shah-e-Deen ne kaha

Qatl Alamdar ho gaya, haye hum ghareeb ho gaye
Sher jaisa bhai tha mera, haye hum ghareeb ho gaye

Bachchon ne koze phenke
Roke alam se lipte
Dekho aye Zeeshan o Raza
Deta hai taseer sada

Yaad woh manzar aaya
Shor tha khaimon mein bapa
Haye Sakina (a.s.), haye pyas
Haye Sakina (a.s.), haye pyas