Chhin Jayegi Sar Se Bhi Ye Chadar Mere Abbas

Zainab Kahe Rokar Ay Baradar Mere Abbas,
Chhin Jayegi Sar Se Bhi Ye Chadar Mere Abbas,
Lut Jayega Ye Baad Tere Ghar Mere Abbas,
Chhin Jayegi Sar Se Bhi Ye Chadar Mere Abbas.

Dasht-e-bala Me Zulm-o-sitam Dhayenge Layeen,
Qaidi Bana Ke Dar Badar Phirayenge Layeen,
Har Gham Uthayegi Teri Khwahar Mere Abbas,
Chhin Jayegi Sar Se Bhi Ye Chadar Mere Abbas.

Hamko Jafayen Denge Sitamgar Tumhare Baad,
Chheenenge Sakina Ke Bhi Gauhar Tumhare Baad,
Rokar Kahe Ali Ki Ye Dukhtar Mere Abbas,
Chhin Jayegi Sar Se Bhi Ye Chadar Mere Abbas.

Marega Sakina Ko Tamanche Jo Sitamgar,
Abbas Pukaregi Tumhen Ammu Wo Kahkar,
Baba Kahegi Wo Kabhi Akbar Mere Abbas,
Chhin Jayegi Sar Se Bhi Ye Chadar Mere Abbas.

Rone Bhi Nahi Dega Hamen Shimr Kamina,
Marega Tazyana Agar Royi Sakina,
Kaise Sahega Aabid-e-muztar Mere Abbas,
Chhin Jayegi Sar Se Bhi Ye Chadar Mere Abbas.

Ik Rassi Me Hi Barah Gale Bandhe Jayenge,
Ahl-e-jafa Hamen Yoon Tamasha Banayenge,
Degi Sadayen Zainab-e-muztar Mere Abbas,
Chhin Jayegi Sar Se Bhi Ye Chadar Mere Abbas.

Soyegi Qaid-e-shaam Me Kis Tarha Sakina,
Yaad Aayega Is Bachchi Ko Jo Baap Ka Seena,
Mar Jayegi Is Gham Me Tadapkar Mere Abbas,
Chhin Jayegi Sar Se Bhi Ye chadar Mere Abbas.

Abbas Qatl Ho Gaye Nahr-e-furat Par,
Roti Rahi 'Raees' Bahan Bhai Se Chhutkar,
Kahti Rahi Husain Ki Khwahar Mere Abbas,
Chhin Jayegi Sar Se Bhi Ye Chadar Mere Abbas.